ਕਨੇਡਾ ਦੇ ਸੂਬੇ ਬ੍ਰਿਟਿਸ਼ ਕੋਲੰਬੀਆ ਦੀਆਂ ਅਨੇਕਾਂ ਪੰਥਕ ਜਥੇਬੰਦੀਆਂ ਨੇ ਇਕੱਠੇ ਹੋ ਕੇ ਨਵੇਂ ਸਾਂਝੇ ਮੰਚ ‘ਪੰਥਕ ਅਲਾਇੰਸ ਬੀ.ਸੀ.’ ਦੀ ਸਥਾਪਨਾ ਦਾ ਐਲਾਨ ਕੀਤਾ ਹੈ। ਇਹ ਮੰਚ ਅਕਾਲ ਫੋਰਸ, ਬੱਬਰ ਅਕਾਲੀ ਲਹਿਰ, ਬੀ.ਸੀ. ਅਖੰਡ ਕੀਰਤਨੀ ਜਥਾ ਐਜੂਕੇਸ਼ਨਲ ਸੋਸਾਇਟੀ, ਚਲਦਾ ਵਹੀਰ ਕੈਨੇਡਾ, ਨੋਰਥ ਅਮੈਰਿਕਨ ਸਿੱਖ ਐਸੋਸੀਏਸ਼ਨ, ਪੰਥਕ ਮੀਡੀਆ, ਦਾ ਅਨਡਾਇੰਗ ਮੋਰਚਾ, ਤੂਫ਼ਾਨ ਸਿੰਘ ਯੂਥ ਫੇਡਰੇਸ਼ਨ ਅਤੇ ਸਤਿਕਾਰ ਸੇਵਾ ਨੈੱਟਵਰਕ ਸੁਸਾਇਟੀ ਵੱਲੋਂ ਸਾਂਝੇ ਤੌਰ ‘ਤੇ ਬਣਾਇਆ ਗਿਆ ਹੈ।
ਇਸ ਗਠਜੋੜ ਦੀ ਘੋਸ਼ਣਾ ਕਰਦੇ ਹੋਏ ਜਥੇਬੰਦੀਆਂ ਨੇ ਦੱਸਿਆ ਕਿ ‘ਪੰਥਕ ਅਲਾਇੰਸ ਬੀ.ਸੀ.’ ਦਾ ਮੁੱਖ ਉਦੇਸ਼ ਪੰਥਕ ਏਕਤਾ ਨੂੰ ਮਜ਼ਬੂਤ ਕਰਨਾ ਅਤੇ ਗੁਰਮਤਿ ਦੇ ਆਧਾਰ ‘ਤੇ ਸੰਗਤ ਦੀ ਆਵਾਜ਼ ਬਣਨਾ ਹੈ। ਉਨ੍ਹਾਂ ਜ਼ਿਕਰ ਕੀਤਾ ਕਿ ਖਾਲੀ ਏਕਤਾ ਦੇ ਨਾਅਰੇ ਦੀ ਬਜਾਏ ਅਸਲ ਪੰਥਕ ਏਕਤਾ ਗੁਰਮਤਿ ਅਤੇ ਸਿਧਾਂਤਕ ਆਧਾਰ ‘ਤੇ ਹੀ ਸੰਭਵ ਹੈ।
ਇਸ ਅਲਾਇੰਸ ਦੇ ਸਾਰੇ ਮੈਂਬਰ ਜਥੇਬੰਦੀਆਂ ਨੇ ਦੋ ਮੂਲ ਸਿਧਾਂਤਾਂ ‘ਤੇ ਆਪਣੇ ਸਮਰਥਨ ਦੀ ਪੁਸ਼ਟੀ ਕੀਤੀ ਹੈ:
1.ਗੁਰਮਤਿ ਅਧੀਨਤਾ – ਹਰ ਫੈਸਲਾ ਅਤੇ ਕਾਰਵਾਈ ਗੁਰਬਾਣੀ ਦੀ ਰੋਸ਼ਨੀ ‘ਚ ਕੀਤੀ ਜਾਵੇਗੀ।
2. ਖਾਲਿਸਤਾਨ ਪ੍ਰਤੀਬੱਧਤਾ – ਹਰ ਮੈਂਬਰ ਜਥੇਬੰਦੀ ਖਾਲਿਸਤਾਨ ਦੀ ਪ੍ਰਾਪਤੀ ਲਈ ਦ੍ਰਿੜ੍ਹ ਹੈ, ਜੋ ਕਿ ਖਾਲਸੇ ਦੇ ਰਾਜ ਅਤੇ ਆਜ਼ਾਦੀ ਦਾ ਪ੍ਰਤੀਕ ਹੈ।
ਅਲਾਇੰਸ ਦੇ ਬੁਲਾਰੇ ਅਨੁਸਾਰ, ਇਹ ਨਵਾਂ ਮੰਚ ਸਥਾਨਕ ਅਤੇ ਵਿਸ਼ਵ ਪੱਧਰ ‘ਤੇ ਪੰਥਕ ਮੁੱਦਿਆਂ ਉੱਤੇ ਆਵਾਜ਼ ਬੁਲੰਦ ਕਰੇਗਾ, ਗੁਰਮਤਿ ਅਧਾਰਿਤ ਕਾਰਵਾਈ ਵਿੱਚ ਹਿੱਸਾ ਲਵੇਗਾ ਅਤੇ ਧਰਮ ਪ੍ਰਚਾਰ, ਸਮਾਜਿਕ ਸੇਵਾ ਅਤੇ ਸਿੱਖੀ ਪਰਚਾਰ ਨਾਲ ਜੁੜੇ ਉਪਰਾਲੇ ਸ਼ੁਰੂ ਕਰੇਗਾ।
ਪੰਥਕ ਅਲਾਇੰਸ ਬੀ.ਸੀ. ਵੱਲੋਂ ਸਥਾਨਕ ਸੰਗਤ ਨੂੰ ਅਪੀਲ ਕੀਤੀ ਗਈ ਹੈ ਕਿ ਉਹ ਇਸ ਅਲਾਇੰਸ ਨਾਲ ਜੁੜਣ, ਉਨ੍ਹਾਂ ਦੇ ਸੋਸ਼ਲ ਮੀਡੀਆ ਚੈਨਲਾਂ ‘ਤੇ ਨਾਲ ਜੁੜਨ ਅਤੇ ਪੰਥਕ ਮੁੱਦਿਆਂ ‘ਤੇ ਜਾਗਰੂਕਤਾ ਵਧਾਉਣ ਵਿੱਚ ਆਪਣਾ ਯੋਗਦਾਨ ਪਾਉਣ।
