ਪੰਜਾਬ ਵਿੱਚ ਖੇਤੀਬਾੜੀ ਨੂੰ ਨਵੀਂ ਉਚਾਈਆਂ ਤਕ ਪਹੁੰਚਾਉਣ ਲਈ ਤਕਨੀਕੀ ਉੱਨਤੀ ਦੀ ਤਿਆਰੀ ਜ਼ੋਰਾਂ ‘ਤੇ ਹੈ। ਲੁਧਿਆਣਾ ਦੀ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ (PAU) ਵਿੱਚ ਭਾਰਤ ਦਾ ਪਹਿਲਾ ਏ.ਆਈ. (AI) ਸਕੂਲ ਬਣਨ ਜਾ ਰਿਹਾ ਹੈ, ਜਿਸ ਦੀ ਸ਼ੁਰੂਆਤ 2025 ਸੈਸ਼ਨ ਤੋਂ ਹੋਵੇਗੀ। ਇਸ ਤੋਂ ਇਲਾਵਾ, PAU ਨੇ ਡਰੋਨ ਟ੍ਰੇਨਿੰਗ ਪ੍ਰੋਗਰਾਮ ਸ਼ੁਰੂ ਕਰਨ ਦਾ ਵੀ ਐਲਾਨ ਕੀਤਾ ਹੈ, ਜੋ ਕਿ ਖੇਤੀਬਾੜੀ ਨੂੰ ਆਧੁਨਿਕ ਬਣਾਉਣ ਵੱਲ ਇਕ ਹੋਰ ਵੱਡਾ ਕਦਮ ਹੋਵੇਗਾ।
PAU ਦੇ ਖੇਤੀਬਾੜੀ ਇੰਜੀਨੀਅਰਿੰਗ ਵਿਭਾਗ ਨੇ ਡਰੋਨ ਉਡਾਣ ਦੀ ਸਿਖਲਾਈ ਦੇਣ ਲਈ ਤਿਆਰੀਆਂ ਮੁਕੰਮਲ ਕਰ ਲਈਆਂ ਹਨ। ਵਿਭਾਗ ਦੇ ਡੀਨ ਅਤੇ ਡਰੋਨ ਇੰਸਟਰਕਟਰ ਨੇ ਇਹ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਵਿਦੇਸ਼ਾਂ ‘ਚ ਪਹਿਲਾਂ ਹੀ ਪ੍ਰਚਲਿਤ ਡਰੋਨ ਟੈਕਨੋਲੋਜੀ ਹੁਣ ਪੰਜਾਬ ਵਿੱਚ ਵੀ ਆ ਰਹੀ ਹੈ। ਖੇਤੀਬਾੜੀ ਵਿੱਚ ਡਰੋਨ ਦੀ ਵਰਤੋਂ ਜ਼ਮੀਨ ਦੀ ਨਕਸ਼ਾਬੰਦੀ, ਸਪਰੇਅ, ਅਤੇ ਮੌਸਮੀ ਹਾਲਾਤ ਦਾ ਅੰਦਾਜ਼ਾ ਲਗਾਉਣ ਵਿੱਚ ਕਾਫ਼ੀ ਮਦਦਗਾਰ ਹੋਵੇਗੀ।
PAU ਦੇ ਵਾਈਸ ਚਾਂਸਲਰ, ਡਾ. ਸਤਬੀਰ ਸਿੰਘ ਗੋਸਲ, ਨੇ ਕਿਹਾ ਕਿ ਏਆਈ ਸਕੂਲ ਅਤੇ ਡਰੋਨ ਟ੍ਰੇਨਿੰਗ ਸਮੇਂ ਦੀ ਲੋੜ ਹਨ। ਉਨ੍ਹਾਂ ਦੱਸਿਆ ਕਿ PAU ਨੇ ਅੰਤਰਰਾਸ਼ਟਰੀ ਯੂਨੀਵਰਸਿਟੀਆਂ ਅਤੇ ਕਾਲਜਾਂ ਨਾਲ ਮੇਲ ਕੀਤਾ ਹੈ, ਤਾਂ ਜੋ ਵਿਦਿਆਰਥੀਆਂ ਨੂੰ ਅਧੁਨਿਕ ਖੇਤੀ ਤਕਨੀਕਾਂ ਦੀ ਸਮਝ ਦੇਣ ਲਈ ਉੱਤਮ ਸਿਖਲਾਈ ਦਿੱਤੀ ਜਾ ਸਕੇ। ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਸੂਬਾ ਅਤੇ ਕੇਂਦਰ ਸਰਕਾਰ ਵੀ ਇਸ ਪ੍ਰੋਜੈਕਟ ਵਿੱਚ ਸਹਿਯੋਗ ਦੇ ਰਹੀਆਂ ਹਨ।
ਸਿਖਲਾਈ ਫੀਸ ਅਤੇ ਕੋਰਸ ਦੀ ਮਿਆਦ
ਡਰੋਨ ਟ੍ਰੇਨਿੰਗ ਲਈ 35,000 ਰੁਪਏ + GST ਫੀਸ ਹੋਵੇਗੀ।
👉 ਕੋਰਸ ਦੀ ਮਿਆਦ: 7 ਦਿਨ
👉 ਸ਼ੁਰੂਆਤੀ ਗਰੁੱਪ: 20 ਵਿਦਿਆਰਥੀ ਜਾਂ ਕਿਸਾਨ
👉 ਘੱਟੋ-ਘੱਟ ਵਿਦਿਆਰਥੀ: 10 (ਜੇ 10 ਵੀ ਹੋ ਜਾਣ, ਤਾਂ ਵੀ ਕੋਰਸ ਸ਼ੁਰੂ ਹੋ ਸਕਦਾ ਹੈ)
ਪਹਿਲਾਂ “ਡਰੋਨ ਦੀਦੀ” ਸਕੀਮ ਦੇ ਤਹਿਤ ਪੰਜਾਬ ਦੀਆਂ ਕੁਝ ਮਹਿਲਾਵਾਂ ਗੁੜਗਾਂਵ, ਦਿੱਲੀ ਜਾ ਕੇ ਡਰੋਨ ਸਿਖਲਾਈ ਪ੍ਰਾਪਤ ਕਰ ਚੁੱਕੀਆਂ ਹਨ। ਹੁਣ ਇਹ ਸਿਖਲਾਈ ਪੰਜਾਬ ਵਿੱਚ ਹੀ ਉਪਲਬਧ ਹੋਵੇਗੀ, ਜੋ ਕਿ ਖੇਤੀਬਾੜੀ ਦੇ ਭਵਿੱਖ ਲਈ ਇੱਕ ਵੱਡੀ ਤਬਦੀਲੀ ਹੋਵੇਗੀ।
PAU ਦਾ ਏਆਈ ਸਕੂਲ ਅਤੇ ਡਰੋਨ ਟ੍ਰੇਨਿੰਗ ਪ੍ਰੋਗਰਾਮ ਪੰਜਾਬ ਦੀ ਖੇਤੀਬਾੜੀ ਨੂੰ ਆਧੁਨਿਕ, ਕਾਰਗਰ ਅਤੇ ਤਕਨੀਕੀ ਦੌਰ ਨਾਲ ਜੋੜਨ ਲਈ ਇੱਕ ਸ਼ਲਾਘਾਯੋਗ ਉਪਰਾਲਾ ਹੈ।