ਗਿਆਨੀ ਹਰਪ੍ਰੀਤ ਸਿੰਘ ਨੇ ਆਪਣੇ ਸੋਸ਼ਲ ਮੀਡੀਆ ਖਾਤੇ ਤੋਂ ਸਮੁੱਚੀਆਂ ਧਿਰਾਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ-
ਕੇਂਦਰ ਸਰਕਾਰ ਵੱਲੋਂ ਚੰਡੀਗੜ੍ਹ ਨੂੰ ਪੰਜਾਬ ਤੋਂ ਪੂਰੀ ਤਰ੍ਹਾਂ ਖੋਹ ਕੇ ਅਲੱਗ ਕੇਂਦਰ ਸ਼ਾਸਤ ਪ੍ਰਦੇਸ਼ ਬਣਾਉਣ ਦੀ ਜੋ ਸਾਜ਼ਿਸ਼ ਪਾਰਲੀਮੈਂਟ ਦੇ ਸਰਦ ਰੁੱਤ ਇਜਲਾਸ ਦੇ ਏਜੰਡੇ ਰਾਹੀਂ ਸਾਹਮਣੇ ਆਈ ਹੈ, ਉਸ ਖਿਲਾਫ਼ ਪੰਜਾਬ ਦੀਆਂ ਸਾਰੀਆਂ ਸਿਆਸੀ ਧਿਰਾਂ ਦਾ ਤੁਰੰਤ ਇੱਕਜੁੱਟ ਹੋਣਾ ਸਮੇਂ ਦੀ ਸਭ ਤੋਂ ਵੱਡੀ ਲੋੜ ਹੈ। ਇਹ ਮੁੱਦਾ ਕਿਸੇ ਇੱਕ ਪਾਰਟੀ ਦਾ ਨਹੀਂ, ਸੂਬੇ ਦੀ ਇਤਿਹਾਸਕ ਅਤੇ ਸੰਵੈਧਾਨਿਕ ਪਛਾਣ ਦਾ ਹੈ।
ਪੰਜਾਬ ਦੀ ਸੱਤਾਧਾਰੀ ਪਾਰਟੀ ਲਈ ਕੱਲ ਹੋਣ ਵਾਲਾ ਵਿਧਾਨ ਸਭਾ ਸੈਸ਼ਨ ਇੱਕ ਕਸੌਟੀ ਹੈ। ਵਿਧਾਨ ਸਭਾ ਵਿੱਚ ਕੇਂਦਰ ਦੇ ਇਸ ਗੈਰ-ਸੰਵਿਧਾਨਿਕ ਹਮਲੇ ਖਿਲਾਫ ਸਖ਼ਤ ਸਟੈਂਡ ਲੈਂਦਿਆਂ ਵਿਰੋਧ ਮਤਾ ਪਾਸ ਕਰਕੇ ਤੁਰੰਤ ਰਾਸ਼ਟਰਪਤੀ ਨੂੰ ਭੇਜਣਾ ਚਾਹੀਦਾ ਹੈ। ਇਹ ਮੌਕਾ ਕਦੇ ਵੀ ਭਾਵਨਾਤਮਕ ਦਿਖਾਵੇ ਜਾਂ ਸਿਆਸੀ ਸ਼ੋਅ ਦੇ ਨਾਂ ‘ਤੇ ਗੁਆਇਆ ਨਹੀਂ ਜਾਣਾ ਚਾਹੀਦਾ।
ਗੁਰੂ ਸਾਹਿਬ ਦੇ ਪਵਿੱਤਰ ਨਾਮ ‘ਤੇ ਲੋਕਾਂ ਦੀਆਂ ਭਾਵਨਾਵਾਂ ਨਾਲ ਖੇਡਦਿਆਂ ਅਸਲ ਜ਼ਿੰਮੇਵਾਰੀ ਤੋਂ ਪਾਸਾ ਨਹੀਂ ਮੋੜਿਆ ਜਾ ਸਕਦਾ। ਵਿਧਾਨ ਸਭਾ ਦਾ ਸਦਨ ਅਤੇ ਗੁਰੂਆਂ ਦੀ ਸਿੱਖਿਆ—ਦੋਵਾਂ ਨਾਲ ਜ਼ਬਰੀ ਹਕੂਮਤਾਂ ਵਾਂਗ ਵਰਤਾਰਾ ਕਰਨਾ ਗੁਰੂ ਸਾਹਿਬ ਦੀ ਸਿੱਖਿਆ ਦੇ ਅਸਲ ਮੰਤਵ ਦੇ ਖਿਲਾਫ਼ ਹੈ।
ਪੰਜਾਬ ਨੂੰ ਆਪਣੇ ਹੱਕਾਂ ਲਈ ਸਾਫ਼, ਦ੍ਰਿੜ੍ਹ ਅਤੇ ਇਕੱਠੇ ਸਟੈਂਡ ਦੀ ਲੋੜ ਹੈ—ਇਹ ਸਮਾਂ ਬਿਆਨਾਂ ਦਾ ਨਹੀਂ, ਫ਼ੈਸਲੇ ਕਰਨ ਦਾ ਹੈ।
