ਪਿਛਲੇ ਦਿਨੀਂ ਹਰਮਨਪ੍ਰੀਤ ਕੌਰ ਦੀ ਪੰਜਾਬ ਯੂਨੀਵਰਸਿਟੀ ਵਿੱਚ ਪੁਲਿਸ ਨਾਲ ਜੋ ਬਹਿਸ ਹੋਈ ਅਤੇ ਜੋ ਮਾਨ ਦਲ ਨੇ ਉਸ ਨੂੰ ਸਨਮਾਨਿਤ ਕੀਤਾ ਉਸ ਬਾਰੇ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ ਜਵਾਬ ਦੇਂਦਿਆਂ ਆਪਣੇ ਸੋਸ਼ਲ ਮੀਡੀਆ ਖਾਤੇ ‘ਤੇ ਸਪਸ਼ਟ ਕੀਤਾ ਹੈ ਕਿ-
ਚੰਡੀਗੜ੍ਹ ਦੀ ਪੰਜਾਬ ਯੂਨੀਵਰਸਿਟੀ ‘ਚ ਪ੍ਰਦਰਸ਼ਨ ਦੌਰਾਨ ਚੰਡੀਗੜ੍ਹ ਪੁਲਿਸ ਨਾਲ ਭਿੜਨ ਵਾਲੀ ਕੁੜੀ ਹਰਮਨਪ੍ਰੀਤ ਕੌਰ ਨੂੰ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਨੇ ਆਪਣੀ ਸਟੇਜ ਤੋਂ ਸਨਮਾਨਿਤ ਕੀਤਾ ਹੈ।
ਇੰਸਟਾਗ੍ਰਾਮ ‘ਤੇ ਨੌਜਵਾਨ ਪੀੜ੍ਹੀ ਇਸ ਗੱਲ ਦਾ ਮਖੌਲ ਬਣਾ ਰਹੀ ਹੈ ਕਿ “ਹਰਮਨਪ੍ਰੀਤ ਕੌਰ ਦੀ ਉਪਲਬਧੀ ਕੀ ਹੈ ਜੋ ਉਸ ਨੂੰ ਮਾਈ ਭਾਗੋ ਦੇ ਨਾਂਅ ਤੋਂ ਸਨਮਾਨ ਦਿੱਤਾ ਗਿਆ।
ਪਾਕਿਸਤਾਨ ਦੀ ਇੱਕ ਵਿਦਿਆਰਥਣ ਮਲਾਲਾ ਯੂਸੁਫਜ਼ਈ ਜਦੋਂ ਉਹ 15 ਸਾਲ ਦੀ ਸੀ ਤਾਂ ਉਸਨੂੰ ਤਾਲਿਬਾਨ ਦੇ ਇੱਕ ਅੱਤਵਾਦੀ ਨੇ ਗੋਲੀ ਮਾਰ ਦਿੱਤੀ ਸੀ। ਜਿਸ ਮਗਰੋਂ ਮਲਾਲਾ ਦਾ ਇਲਾਜ਼ ਚੱਲਿਆ ਅਤੇ ਉਹ ਠੀਕ ਹੋ ਗਈ। ਮਲਾਲਾ ਨੂੰ ਇਸ ਨਿੱਕੀ ਉਮਰੇ ਅੱਤਵਾਦੀ ਹਮਲੇ ‘ਚੋਂ ਬਚ ਨਿਕਲਣ ਲਈ ਦੁਨੀਆ ਦਾ ਸਭ ਤੋਂ ਵੱਡਾ ਪੁਰਸਕਾਰ ਨੋਬਲ ਪੁਰਸਕਾਰ ਮਿਲਿਆ। ਉਦੋਂ ਵੀ ਬਹੁਤ ਸਾਰੇ ਲੋਕਾਂ ਨੇ ਇਹੀ ਕਿਹਾ ਕਿ ਮਲਾਲਾ ਦੀ ਦੇਣ ਕੀ ਹੈ। ਉਹ ਤਾਂ ਲੱਖਾਂ ਲੋਕਾਂ ਵਾਂਗ ਸਿਰਫ ਇੱਕ ਪੀੜਤ ਸੀ।
ਪਰ ਮਲਾਲਾ ਸਿਰਫ ਇੱਕ ਅੱਤਵਾਦੀ ਹਮਲੇ ਦੀ ਪੀੜਤ ਨਹੀਂ ਸੀ। ਉਹ ਅੱਤਵਾਦ ਖਿਲਾਫ ਲੜਨ ਦਾ ਚਿੰਨ ਬਣ ਗਈ। ਉਸ ਨੂੰ ਹੋਰ ਵੀ ਅਨੇਕਾਂ ਪੁਰਸਕਾਰ ਮਿਲੇ ਅਤੇ ਸੰਯੁਕਤ ਰਾਸ਼ਟਰ (ਯੂ.ਐਨ) ‘ਚ ਬੋਲਣ ਦਾ ਮੌਕਾ ਮਿਲਿਆ।
ਭਾਰਤ ਵਰਗੇ ਦੇਸ਼ ‘ਚ ਪੁਲਿਸ ਇੱਕ ਡਰ ਦਾ ਪ੍ਰਤੀਕ ਹੈ। ਜਿੱਥੇ ਪੱਛਮੀ ਮੁਲਕਾਂ ‘ਚ ਲੋਕ ਪੁਲਿਸ ਨੂੰ ਆਪਣਾ ਸਹਾਇਕ ਮੰਨਦੇ ਹਨ। ਭਾਰਤ ‘ਚ ਪੁਲਿਸ ਤੋਂ ਜਿੰਨਾ ਹੋ ਸਕੇ ਬਚਿਆ ਜਾਂਦਾ ਹੈ। ਹਰਮਨਪ੍ਰੀਤ ਕੌਰ ਦਾ ਪੁਲਿਸ ਮੁਲਾਜ਼ਮਾਂ ਨੂੰ ਇਹ ਕਹਿਣਾ ਕਿ “ਆਪਣਾ ਹਿਸਾਬ ਲਾ ਲਈਂ” ਇਸ ਗੱਲ ਦਾ ਪ੍ਰਤੀਕ ਹੈ ਕਿ ਨੌਜਵਾਨ ਪੀੜ੍ਹੀ ਪੁਲਿਸ ਦੇ ਇਸ ਡਰ ਨੂੰ ਜੋ ਖਾਸਕਰ ਪੰਜਾਬੀਆਂ ‘ਚ 1980 ਦੇ ਦਹਾਕੇ ‘ਤੋਂ ਮਨਾਂ ‘ਚ ਬੈਠਾ ਹੈ, ਉਸ ਨੂੰ ਸਹਿਣ ਨਹੀਂ ਕਰੇਗੀ।
ਮਾਨ ਦਲ ਵੱਲੋਂ ਇਹ ਸਨਮਾਨ ਸਿਰਫ ਹਰਮਨਪ੍ਰੀਤ ਦਾ ਨਹੀਂ ਬਲਕਿ ਦਲੇਰੀ ਅਤੇ ਜਜ਼ਬੇ ਦਾ ਸਨਮਾਨ ਹੈ।”
